Մրցույթի մասին
Գույնի և լույսի ներդաշնակություն, հնի ու նորի, ավանդույթի և նորարարության համարձակ երկխոսություն, վրձնի նուրբ ու հզոր հարվածի միաձուլում, ավանդական մտածողության և ամենախենթ երիտասարդի երևակայության հանդիպում։
Մրցույթի առաքելությունն է բացահայտել և խրախուսել տաղանդավոր նկարիչներին, վերարժևորել և նորովի ներկայացնել հայկական կերպարվեստը, խթանել ժամանակակից արվեստի զարգացումն ու հանրահռչակումը։
Այն նպատակ ունի ստեղծելու արվեստի զարգացման ամուր կամուրջներ՝ ձևավորելով համագործակցության, համադրման և արվեստի կառավարման մասնագիտական միջավայր, նպաստելով ոլորտում կրթական ծրագրերի և մասնագիտական դպրոցների կայացմանն ու առաջընթացին։
Մրցույթ, որը կրում է հայ կերպարվեստի մեծանուն վարպետներից մեկի՝ Մարտիրոս Սարյանի անունը։
Սարյանական արվեստը մարմնավորում է հայկական գույնի փիլիսոփայությունը՝ իր արևահամ ջերմությամբ, բնության կենսախինդ շնչով և ձևի պարզ, սակայն ընդգծված հնչեղությամբ։ Նրա ստեղծագործությունը միավորում է ազգային ակունքներն ու համաշխարհային արդի գեղարվեստական հոսանքները՝ հայկական լեռնաշխարհի լույսն ու արևելյան հարստագույն գունապնակը վերածելով համամարդկային լեզվի։
Սարյանի գեղանկարչությունը ոչ միայն շարունակությունն է դարավոր մշակութային ժառանգության, այլև նոր ժամանակների մեկնակետ՝ ավանդույթի և նորարարության համարձակ ներդաշնակությամբ, որտեղ գույնը դառնում է ինքնուրույն մտածողություն, իսկ կտավը՝ հոգևոր տարածք։